கச்சத்தீவு அருகே இன்று அதிகாலை ராமேசுவரம் மீனவர்கள் 50 பேர் கடத்தல்

by *சம்ஸ் on Thu 14 Mar 2013 - 8:00

ராமேசுவரம், மார்ச் 14-

கச்சத்தீவு அருகே இன்று அதிகாலை ராமேசுவரம் மீனவர்கள் 50 பேர் கடத்தல்: இலங்கை கடற்படை மீண்டும் அட்டூழியம்.

இலங்கை கடற்படையினர் தொடர்ந்து ராமேசுவரம் மீனவர்களை தாக்குவதும், அவர்களை கடத்தி செல்வதும் வாடிக்கையாகிவிட்டது. இலங்கை கடற்படையின் அட்டூழியத்தால் ராமேசுவரம் மீனவர்கள் தினமும் கண்ணீர் வடித்து வருகிறார்கள்.

நேற்று ராமேசுவரத்தில் இருந்து 658 விசைப்படகுகளில் 3,000 மீனவர்கள் மீன்பிடிக்க கடலுக்கு சென்றனர். நேற்று மதியம் கச்சத்தீவு அருகே மீன் பிடித்த தங்கச்சிமடத்தை சேர்ந்த ரெய்மன், முத்து, முருகானந்தம், தாசன், பிலிப், சுடலை, அந்தோணி, இன்னாசி, லேடன், தவிதம், சுமன், ஆரோக்கியசாமி, முனியசாமி, கெபிசன், சுரேஷ், ராபின், முருகன், கேபி ஆகிய 19 மீனவர்களை இலங்கை கடற்படையினர் கடத்தி சென்று விட்டனர். மீனவர்களின் 4 படகுகளையும் பறிமுதல் செய்து விட்டனர். கடத்தப்பட்ட 19 மீனவர்களையும் இலங்கை தலைமன்னாரில் உள்ள முகாமில் அடைக்கப்பட்டுள்ளனர்.

இந்த நிலையில் இன்று காலையில் இலங்கை கடற்படையினர் மீண்டும் அட்டூழியத்தில் ஈடுபட்டு ராமேசுவரம் மீனவர்களை தாக்கி கடத்தி சென்று விட்டனர்.

இதுபற்றிய விவரம் வருமாறு:-

இன்று அதிகாலையில் கச்சத்தீவு அருகே ராமேசுவரம் பகுதியை சேர்ந்த 100-க்கும் மேற்பட்ட மீனவர்கள் மீன் பிடித்துக்கொண்டு இருந்தனர். அப்போது 5 குட்டி கப்பல்களில் இலங்கை கடற்படையினர் மற்றும் கடலோர காவல் படையினர் அங்கு வந்தனர். கடலில் வலைகளை விரித்து மீன்பிடித்துக் கொண்டு இருந்த மீனவர்களை பார்த்து எச்சரித்தனர்.

பின்னர் மீனவர்களை சரமாரி தாக்கி மீன் வலைகளை அறுத்து எறிந்தனர். மேலும் ஆத்திரம் அடங்காமல் 11 படகுகளில் இருந்த 50 மீனவர்களையும் கடத்தி சென்று விட்டனர். கடத்தப்பட்ட மீனவர்களை அவர்கள் நெடுந்தீவு கொண்டு சென்றதாக கூறப்படுகிறது.

மீனவர்கள் மீண்டும் கடத்தப்பட்டதால் ராமேசுவரம் மீனவர்கள் கவலை அடைந்துள்ளனர். மீனவர்களின் குடும்பத்தினர் கண்ணீர் வடித்து வருகிறார்கள். இலங்கை கடற்படையின் அட்டூழியத்தை தடுத்து மீனவர்களை காப்பாற்ற வேண்டும் என்று மத்திய-மாநில அரசுகளுக்கு கோரிக்கை விடுத்துள்ளனர்.

மாலைமலர்